Վերջերս Ծաղկաձորի համայնաքապետարանը աճուրդի էր հանել համայնքի սեփականություն հանդիսացող ծառայողական ավտոմեքենան: Մեկնարկային գինը սահմանել էր 2 մլն. դրամ: Ավտոմեքենայի վաճառքի հայտարարությունն ամենուր տարածել էին, անգամ Կոտայքի մարզպետարանն է իր պաշտոնական էջում տեղադրել, այս կերպ ցույց տալով, որ թափանցիկ են աշխատում։
Իրականում համայնքի ծառայողական ավտոմեքենա գնել է ավագանու ՔՊ-ական անդամ Արմեն Ասատրյանը՝ իր հարսի՝ Դիանա Ասատրյանի ՍՊԸ-ի միջոցով: Մեզ հետաքրքրեց, թե քանի՞ անձ է մասնակցել աճուրդին, քանի որ աճուրդի մասին հայտարարությունը տարբեր հարթակներում տեղադրվել էր.
«Այլ գնորդներ չեն մասնակցել աճուրդին, մասնակցել է մեկ գնորդ, մեքենան գնել է 2 մլն դրամով, ՍՊԸ-ով»,- ասաց Ծաղկաձորի համայնքապետարանի գլխավոր մասնագետ Զոհրաբ Բաբախանյանը։
Էլեկտրոնային ռեգիստրի պաշտոնական կայքում «ՖԱՍՏԲՈՒԻԼԴ» ՍՊԸ-ն գրանցված է Կոտայքի մարզ, Մարմարիկ, 9-րդ փողոց, 15 տուն, նույն հասցեում է բնակվում նաեւ Արմեն Ասատրյանը: ՍՊԸ-ն գրանցված է Դիանա Ասատրյանի անունով, ընկերությունը քաղաքաշինության բնագավառում իրականացնում է բնակելի հասարակական եւ արտադրական շինարարություն: